खेड:- खेड तालुक्यातील आवाशी येथील एका विहिरीत पडलेल्या ४६ वर्षीय प्रौढासह कुत्र्याला ३ तासांच्या बचावकार्यानंतर लोटे एमआयडीसीतील अग्निशमन दलाच्या जवानांनी सुखरुप बाहेर काढले. हरिदर सिंग (सध्या रा. आवाशी) असे प्रौढाचे नाव असून उपचारासाठी रूग्णवाहिकेतून परशुराम रूग्णालयात दाखल करण्यात आले. ही घटना शुक्रवारी रात्री १०.४० च्या सुमारास घडली.
आवाशी येथील एका ८० फूट खोल विहिरीत व्यक्तीसह कुत्रा पडला असल्याची माहिती लोटे एमआयडीसीतील अग्निशमन दलास कळवण्यात आली. त्यानुसार अग्निशमन दलातील उपअग्निशमन अधिकारी ए. जी. सरवदे, प्रमुख अग्निशमन विमोचक व्ही. एन. देसाई, एस. एस. कुलये, चालक यंत्रचालक एम. एम. मोरे, फायरमन एम. डी. पाचांगणे, व्ही. व्ही. कारंडे, पी. आर. कांबळे आदींचे पथक तातडीने घटनास्थळी पोहचून बचावकार्य हाती घेतले. विहिरीत पडलेल्या प्रौढासह कुत्र्याला दलातील जवानांनी दोरीच्या सहाय्याने खाली उतरुन ३ तासांच्या शर्थीच्या प्रयत्नानंतर, सुखरुप बाहेर काढले. रात्री १०.४० वाजता सुरू झालेले बचावकार्य मध्यरात्री २.३० च्या सुमारास थांबले. लोटे एमआयडीसीतील अग्निशमन दलातील जवानांच्या तत्परतेचे सर्वच स्तरांतून कौतुक होत आहे.
